“بدعي من ربنا أنه يقدرني وأصلي صلاة الفجر لأني بنسى وأنا بصلي ومبقتش بفتكر سورة الإخلاص والمرض أجبرني على الاعتزال من غير ما انفذ وصية صديق عمري وكان نفسي أمثل بس ما باليد حيلة”
الفنان يوسف فوزي يوسف فوزي بيتصدر التريندات ومنصات السوشيال ميديا في مصر ودا بعد ما رجع وظهر على الشاشة من جديد
بعد اختفاء طويل وغياب عن المشهد
يوسف فوزي كان ضيف على برنامج “تفاصيل” على قناة صدى البلد بس ظهوره كان صعب لمحبيه وعشاقه
خصوصا أنه ظهر في حالة صعبة وايديه بتترعش وواضح عليه التقدم في العمر
الفنان اللي لمع في فترة متأخرة وبقى من الوجوه المحبوبة على الشاشة
أتكلم عن مشواره الفني وكشف تفاصيل كتيرة في حياته وقال: كنت صاحب مطعم في البداية وفي مرة روحت
للمخرج نيازي مصطفى وقولتله عاوز امثل وابقى فنان وفعلا الفرصة جاتلي وشاركت في فيلم “وحوش في المينا”. وأول مرة قابلت الفنان فريد شوقي خدني بالحضن وقالي: “لازم تحب المهنة عشان تحبك وأنا شوفتك بتيجي اللوكيشن كتير هنا وبتحاول
الفنان يوسف فوزي اللي المرض أجبره على الاعتزال كشف أن أسرته كانت رافضة في البداية أنه يدخل مجال التمثيل وراح من وراهم وصور أول مشاهده ولما والده عرف بالموضوع قاله لما تبقى تفلح وتأخد شهادة جامعية ابقى اعمل اللي عاوزة
وأكد أنه كان محظوظ أنه اشتغل مع عمالقة الشاشة زي أحمد زكي وفريد شوقي
وأن والدته كانت بريطانية وأتجوزت والده في مصر وكانت كمان ممثلة عظيمة
يوسف فوزي رد على سؤال عن رجوعه للفن من تاني وقال: مش همثل تاني بسبب مرضي.. وكان نفسي أمثل بس ما باليد حيلة وجاتلي عروض تلفزيونية كتير بس رفضت بسبب حالتي الصحية.. وبخاف من بكرة.
الفنان القدير قطع قلوب محبيه لما قال أنه نفسه يصلي الفجر وأنه بقى بينسى وهو بيصلي
دا حتى سورة الإخلاص مش بيفتكرها وبينساها وبيتوه في نص الآية
مصادفة غريبة كشفها يوسف فوزي لما قال: اتنبأت بمرض الشلل الرعاش اللي بعاني منه وقت تصويري مسلسل “أوبرا عايدة” وعقلي مش مستوعب موت رجاء الجداوي لحد دلوقتي
الفنان كمل كلامه عن مسيرته وشغله مع العمالقة وقال أن احمد زكي اتنبآله أنه هيكون رشد أباظة الجديد بس دا محصلش ونادية الجندي عندها جاذبية كبيرة.. والأتوبيسات كلها بتقف علشان تشوفها. وكان نفسي أقدم شخصية
السباح العالمي عبد اللطيف أبو هيف صديق عمري علشان وصاني بدا بس للأسف موفتش بالوصية
الفنان يوسف فوزي اللي اعتزل الفن في 2015 بعد ما اتصاب بالشلل الرعاش ظهر على الشاشة من جديد وكشف أنه نفسه يرجع للفن من تاني بس مرضه مانعه وبقى بينسى ونفسه يفتكر وهو بيصلي
Discussion about this post