ياسمين صبري تتصدر التريندات بسبب شنطة أيد

ياسمين صبري بتتصدر التريندات في مصربسبب شنطة ايد صغيرة لونها أحمر ولبس الهلال الأحمر المصري ودعم القضية الفلسطينية
طيب ثانية واحدة إيه اللي جاب القلعة جمب البحر؟ وايه علاقة الشنطة الصغيرة بالقضية الفلسطينية وجمعية الهلال الأحمر
اقولك يا سيدي .. ياسمين صبري قررت تدعم إخواتنا في الأرض المحتلة.. وراحت لبست زي الهلال الأحمر المصري.. علشان تساعد في نقل المساعدات
المنتظر دخولها غزة.. بس الحكاية اتقلبت عليها وبدل ما الناس تشيد بيها وبتصرفها لقيت نفسها في مرمى الانتقادات وهجوم عليها من كل حتة
ياسمين شاركت فيديو جديد ليها على حسابها الشخصي في إنستجرام.. وظهرت وهي لابسة
زي الهلال الأحمر المصري.. ووسط الناس المتطوعين اللي بيجهزوا المساعدات الطبية والغذائية اللي بيتم تجهيزها.. ومنتظر دخولها من معبر رفح لسكان غزة المحاصرين بقالهم أسبوعين

ياسمين نشيطة بشكل كبير الفترة الأخيرة ولسه من أيام قليلة كانت بتحضر المباراة الافتتاحية.. لدوري كرة السلة للمحترفين في أبوظبي الـNBA.. مع عدد كبير من النجوم زي الفنانة اللبنانية إليسا.. والفنانة التركية مريم أوزرلي..
وبعدها رجعت على مصر وراحت تدعم الفلسطينيين وتساعد جمعية الهلال الأحمر
ونشرت الفيديو وقالت: شكرا جزيلا لجمعية الهلال الأحمر.. على فرصة المشاركة والتطوع .. اتبرع لجمعية الهلال الاحمر المصري.. لتوصيل المساعدات الطبية والغذائية في غزة..
ورغم أن الموضوع إنساني.. وبيعتبر لافتة جميلة من الفنانة.. وامتداد لمسيرة دعم مشاهير العرب للقضية الفلسطينية إلا أن ياسمين صبري خدت هجوم وانتقادات ملهاش أخر
بسبب شنطة ايدها.. والمكياج الل حاطاه في موقف زي دا..
ياسمين ظهرت في الفيديو ومعاها شنطة ايد صغيرة ولونها أحمر.. ومن علامة Hermesالعالمية .. وسعرها بيعدي الـ 12 ألف دولار أمريكي.. يعني حوالي 370 ألف جنيه مصري..
ناس كتير انتقدت تصرف الفنانة.. واعتبروها رايحة تستعرض مش بتعمل لافتة إنسانية بجد.. وكمان قالوا انها بتعاني من هوس البرندات..
خصوصا ان ياسمين في اخر لقاء ليها على شاشة mbc مع الإعلامي عمرو اديب قالت انها مش بتشتري الشنط بالمبالغ دي وهي بتطلع بيهم كنوع من أنواع الدعاية ..

فده لا الوقت ولا الظرف المناسب لاعلانات الشنط و المفروض أنها رايحة تدعم القضية الفلسطينية وبتحاول تخلي الناس يتبرعوا لصالح الفلسطينيين ويساهموا في تقديم المساعدات لسكان غزة مش رايحة تعكل اعلان لماركة شنط عالمية لدول أصلا بتدعم سرائيل
فياريت الناس تتبرع من غير ما تستنى رسالة فنان ولا حد مشهور