ما حقيقة انتشار البق في مصر؟. الصحة تكشف التطورات (فيديو)

الساعات اللي فاتت لقينا أخبار كتيرة متداولة عن وصول حشرة البق لمصر وبداية انتشارها في البلد

ودا في الوقت اللي الحشرة دي عاملة كابوس لفرنسا ومطلعة عين الفرنسيين والبلد كلها بقت بق في بق

الحكومة الفرنسية أعلنت الطوارئ بسبب حشرة البق وفيه جهود كبيرة  وخطط مكافحة علشان يواجهوا

الحشرة اللي حجمها  زي فتات العيش بس واضح كده ان الحشرة الطفيلية دي اتطفلت بزيادة

وبقت معششة في ركن  في عاصمة الجمال باريس وباقي المدن الفرنسية

الأزمة اللي ممكن تشوفها مضحكة عاملة رعب وقلق للأوروبيين وفيه دول حطت خطط كاملة وجهزت المعدات  خوفا من اجتياح البق .. فالمملكة المتحدة على سبيل المثال اتداول فيها مقطع فيديو  بيُظهر بق الفراش  على رجل واحد من ركاب مترو  خط فيكتوريا والفيديو عمل رعب وبقت الناس ماشية بتجري وخايفة حد يلمسها أو تلمس حد بسبب  انتشار البق  في الشقق ودور السينما والقطارات

الحشرة دي كان العالم المتقدم بيشوفها من آفات الدول النامية والمتخلفة.. ودول العالم الثالث بس المفاجأة أنها ظهرت في أمريكا وكندا والمملكة المتحدة وكمان إسبانيا والمكسيك في الوقت اللي دول عربية على حدود  أوروبا زي تونس والمغرب والجزائر أعلنت الاستنفار والاستعداد لوصول البق للبلاد وشددت الإجراءات الصحية في المؤانى والمطارات

وفي ظل الكوارث الطبيعية الغريبة اللي بقت بتضرب العالم يوم ورا التاني انتشرت أخبار أن البق وصل مصر والحشرة دي هتجتاح البلد وهنشوف أيام  ما يعلم بيها إلا ربنا

الدكتور حسام عبد الغفار المتحدث الرسمي باسم  وزارة الصحة طلع وأكد أن مصر خالية من أي انتشار لحشرة البق  وأن أعمال الترصد  فى مكافحة الحشرات  مستمرة بكل أنحاء الجمهورية

متحدث الصحة قال كمان:  شددنا كافة إجراءات الدخول  من المطارات والموانى  للقادمين من الدول اللي بتعانى من انتشار  حشرة البق وكمان بنقدم توعية للمسافرين  بطرق الوقاية

الدكتور حسام عبد الغفار اتكلم عن أعراض الإصابة  بلدغات حشرة البق وقال : كتير من الناش مش بتحس باللدغة بتاعتها ومش بتظهر عليهم أعراض  ويادوب مكانها بيكون فيه  إحمرار والتهابات بسيطة والناس اللي بتعاني من الحساسية الأعراض بتكون عندها  أشد والحشرة دي بتفرز كمية صغيرة  من المخدر قبل ما تبدأ فى مص الدم من البني آدم وممكن أعراض القرصة  تظهر بعد ايام  وبتظهر على  شكل  التهابات في  سطح الجلد بتخلي الشخص يفضل يهرش  في مكان القرصة  ويحس بحرقان والم

وفي حالات نادرة بتتسبب قرصة  البق في عدم انتظام ضربات القلب وصعوبة فى التنفس والحمى والشعور بالغثيان والقيء وتورم اللسان وبشكل عام لدغات البق مش مخيفة ومش بتتسبب في مشاكل صحية  بس هي مقرفة أكتر منها

موذية  فربنا يستر ومندخلش في حرب مع البق علشان اللي فينا مكفينا