سر انسحاب بيج رامي من بطولة مستر أولمبيا..وحقيقة إصابته بمرض نادر واعتزاله (فيديو)

البطل المصري بيج رامي  فجر مفاجأة يعد طلع وأعلن  انسحابه من مستر أولمبيا خصوصا أن الكل كان مستني رامي يرجع من جديد وينافس على البطولة اللي كسبها مرتين قبل كده وخسرها السنة اللي فاتت

بيج رامي طلع واتكلم في تصريحات تليفزيونية وقال:  بعد المشاورة مع فريقي  قررت أخد استراحة من المشاركة  في مستر أولمبيا السنة دي طبعا تصريح زي كده فتح ماسورة شائعات على السوشيال ميديا وفي المواقع والجرايد

وكلام كتير عن اعتزاله اللعبة وخلاص الراجل قرر يتجه للتدريب وشايف أنه مفيش أمل يكسب البطولة من جديد و زي ما بيقولوا بالبلدي كده العضماية كبرت

الموضوع موقفش على كده دا اتقال أن الراجل اتصاب بمرض نادر بيأكل في عضمه وعضلاته ومخليه مش قادر يقف على رجليه ولا يرجع للفورمة اللي كان عليها ودا السبب اللي خلاه يعتذر عن المشاركة في مستر أولمبيا السنة دي

 بيج رامي  رد على الكلام أنه هيعتزل خلاص  وقال: بالعكس  أنا مش بفكر في اعتزال لعبة كمال الأجسام في الوقت الحالي وهشتغل اكتر مع فريقي علشان اشارك في البطولات الجاية واستنوا فورمة وعودة أقوى … والقرار دا عارف أنه  سيء ومخيب لكتير من المحبين في الشرق الأوسط بس هحاول اشتغل على نفسي الفترة الجاية  علشان ااقدم أفضل نسخة مني

وشايف أن الوقت دا مش مناسب للمشاركة في مستر أولمبيا السنة دي وهأخد فترة تأهيل بس هشارك في بطولة 2024

 بيج رامي  المتوج بلقب مستر أولمبيا مرتين ورا بعض في 2020 و 2021 واحتل المركز الخامس  في البطولة الأخيرة 2022 ومثل أعلى لكتير من عشاق لعبة كمال الأجسام والمصريين بشكل عام  كل  لحكاية انه قرر يأخد استراحة محارب..

هدنة وترتيب أوراق.. خصوصا انه مش هيتحمل يخسر البطولة الأقوى في العالم للسنة التانية على التوالي

 بيج رامي  مش بيفكر نهائي  في اعتزال لعبة كمال الأجسام دلوقتي وبيحاول يتعافى من الإصابة اللي حصلتله الفترة اللي فاتت علشان يشارك في البطولات الجاية وهيكون جاهز وفي أعلى فورمة وهيشارك في بطولة  أرنولد كلاسيك  المقرر في الولايات المتحدة الأمريكية

وقرار انه ميشاركش في بطولة مستر أولمبيا في محله  خصوصا أن مستواه اتراجع بشكل كبير أخر سنتين وأفضل إنجاز حققه كان المركز الرابع في بطولة دولية بالمكسيك علشان كده هو محتاج يأخد فترة راحة وتأهيل ويرجع السنة الجاية بفورمة أقوى

وبعدين ايه المرض النادراللي تجيله الجراة أنه يصيب واحد زي البيج رامي… اعقلوا الكلام يا جماعة

سر انسحاب #بيج_رامي من بطولة مستر أولمبيا.. وحقيقة إصابته بمرض نادر واعتزاله اللعبة