في الوقت اللي ناس كتيرة بقت ماسكة في الدنيا بإيديها وأسنانها ومش فاكره أخرتها ولا بتعمل خير كانت الحاجة نصرة بتضرب أروع مثل في التضحية.. ودا بعد ما قررت أنها تتبرع بكل ثروتها في الدنيا الـ 400 جرام دهب لصالح إخواتنا في فلسطين واللي بيعانوا الحصار والقصف بقالهم 3 أسابيع ومقطوع عنهم الكهرباء والميه والوقود والمساعدات بتدخلهم بالقطارة
الحاجة نصرة عبد الفتاح عندها 59 سنة شافت مناظر الأطفال اللي بيعانوا في القطاع المحاصر ولا حول ليهم ولا قوة فقررت تأخد تحويشة عمرها وكل ثروتها في الدنيا الـ 400 جرام ذهب واللي تمنها بيعدي المليون جنيه وراحت مشيخة الأزهر علشان تتبرع بيهم لصالح أهالي غزة الحاجة نصرة الي جات من مركز أشمون بمحافظة المنوفية كان عندها إصرار تقابل
شيخ الأزهر فضيلة الإمام الأكبر الدكتور أحمد الطيب والراجل بكل تواضع وتسامح قابلها واستقبلها أحسن استقبال
وكشفت أن الدكتورة سحر نصر المدير التنفيذي لبيت الزكاة والصدقات المصري قالتلها قدام الدكتور أحمد الطيب أن فضيلته حكالهم رؤية جاتله في المنام قبل ما تيجي الحاجة نصرة وحلم فيها بتوزيعه الذهب على الناس واتفاجئوا بعدها بحضور الحاجة نصرة للمشيخة علشان تتبرع بكل دهبها وفعلا اتحققت رؤية مولانا شيخ الأزهر
الحاجة نصرة اللي بقت حديث مصر كلها قالت أنها اتبرعت بكل ما تملك من الذهب ومفضلش معاها غير حلق في ودنها وأنها مرتاحة ومبسوطة لمشاركتها في مساعدة ونصرة أهالينا بالمال وأكدت أن اللي عملته مش صدقة ولا تفضل وأن دا حقهم وحق المسلم على المسلم علشان دول أهالينا والأطفال التي بتموت بتعتبرهم أحفادها
الست اللي كانت طايرة من الفرحة بمقابلة فضيلة الإمام الدكتور أحمد الطيب قالت كمان: والله لو معايا تاني ما هتأخر وربنا يعيني وأقدر أتصرف في فلوس وأروح تاني أتبرع واللي بشوفه في التليفزيون من دماء وقتل للأرواح البريئة بيخليني أنام وأنا معيطة واتخيلت نفسي مكانهم وربنا يرفع عنهم البلاء والابتلاء
الست المصرية الأصيلة قالت أن حلمها كان أنها تقدر توصل لمعبر رفح وتدي أهل فلسطين الذهب اللي معاها بإيديها بس بسبب ظروفها الصحية وصعوبة الإجراءات مقدرتش تعمل كده فشافت في التلفزيون شيخ الأزهر عامل مبادرة للي حابب يتبرع لفلسطين وعلطول خدت ذهبها وراحت على المشيخة وقابلت الإمام الأكبر
الحاجة نصرة اللي اتبرعت بعقد وزنه 170 جرام و11 غويشة ودهبها الـ 400 جرام ضربت مثل في التضحية وازاي الواحد يجاهد في سبيل الله ولو بماله فربنا يجازيها خير عن اللي عملته ويعوضها في الأخرة ويرفع البلاء عن إخواتنا في الأرض المحتلة
Discussion about this post