أنتا كل عمل تشارك فيه تطلع منه بفضيحة وتفتكروا ليه الست تضرب راجل بالقلم ؟ بالكلمتين دول علقت الفنانة لقاء سويدان على ضربها للفنان ميدو عادل بالقلم على خشبة المسرح وقدام الحضور
ميدو عادل ولقاء سويدان جمعهم عمل فني المفروض أنه لواحد من أهم الفنانيين اللي جم في تاريخ مصر وبيقدموا مسرحية فنان الشعب سيد درويش على خشبة مسرح البالون
المسرحية يمكن ناس كتير مسمعوش بيها ولا عرفوا مين أبطالها بس اللي حصل بعد العرض الأخير
خلى اللي معرفش يعرف والكل بيدور على قصة ضرب لقاء سويدان لميدو عادل بالقلم قدام الناس وعلى خشبة المسرح
القصة اللي اتصدرت التريندات في مصر ومنصات السوشيال ميديا كلها بتتكلم عن الموضوع حصلت بعد العرض النهائي لمسرحية سيد درويش واللي كان بيقوم بدوره ميدو عادل
في الوقت اللي كانت لقاء سويدان بتجسد شخصية جليلة العالمة
الستارة نزلت وخلاص الجمهور بيسقف لفريق العمل.. وفجأة لقاء سويدان ضربت ميدو عادل بقلم
صوته رن في المسرح كله وقدام الناس والموضوع كان صدمة للكل ووصل أنهم طلبوا الشرطة
علشان تيجي وتفض الخناقة
سويدان قالت أن زميلها في العمل كان بيتريق عليها طول فترة العرض ووصل الأمر أنه شتمها
وسبها بألفاظ خارجة قدام فريق المسرحية أكتر من مرة وشايف أنها مش بتعرف تمثل
لقاء كانت بتسكت وتغل جواها لحد ما المسرحية خلصت وقامت ضارباه بالقلم قدام الكل ووقتها ميدو عادل حاول يتهجم عليها علشان يردلها القلم بس فريق العمل مسكه واتلموا حواليه
والحكاية كبرت وفضلت سويدان تصرخ بأعلى صوت وتقوله:
“أنت كل عمل تشارك فيه بتطلع منه بفضيحة“
وطلبت الشرطة علشان تيجي وتنجدها ومدير المسرح محمد عمر أمر بإطفاء الأنوار
علشان يفض الاشتباك والخناقة
الفنانة اتكلمت وقالت إنها قدمت شكوي في ميدو عادل من يوم 26 من اغسطس الماضي
وأن الفنان كان بيستفزها وبيتعدى عليها لفظيا بكلمات خارجة والموضوع كان صعب
ووصل بيها الأمر أنها قالت: ” تفتكروا ليه الست تضرب راجل بالقلم؟“.
بس المفاجأة ان خناقتهم دي مش أول مرة وسبق وحصلت خناقة بين الاتنين في الإسكندرية
وقدمت فيه شكوى رسمية برضوه يعني فيه تار بايت
ميدو عادل رفض يعلق على الخناقة رغم ان اسمه اتصدرت التريندات واكتفى أنه نشر
أبيات شعر لنجيب سرور في حسابه على فيسبوك وقال:
«يا عالم الزيف المزوق مثل وجه العاهرة كيف المفر؟
الكاتب السيد إبراهيم مؤلف مسرحية سيد درويش قال أن لقاء سويدان كانت مبيتة النية وقالتله أنها هتنهي عرض المسرحية قبل الخناقة بليلة وضيعت مجهود 4 سنين وكانت مترصدة لميدو عادل
وبتحاول تشوه صورته بس الراجل تمالك أعصابه وحافظ على مجهود الفريق واسمه
Discussion about this post